Mogadishu Friday, 2 January 2009
Allaha u naxariistee Sheekh Maxamad Ceelbuur ayey Kooxda Al-shabaab ku dileen xalay oo Jimci aheyd abaarihii 7:dii fiidnimo ee xilliga Muqdisho Gurigiisa oo ku yaala degaanka Ceelasha Biyaha Magaalada muqdisho , Sheekha ayaa kamid ahaa Culamaaudiinka Caanka ah ee (Ahlu Sunna Wal-jamaaca) , nimanka dilay Sheekha ayaa la sheegay in ay ahaayeen Laba Nin oo afka soo duubtay kuna hubeysnaa Bastoolado, kuwaas oo kasoo raacay Masjidka oo uu kusoo tukaday salaadii Maqribka waxeyna Sheekha ugu galeen gurigiisa oo uu ku sugnaa, dabadeedna waxey u dhufteen ilaa afar xabadood , isagoo Sheehu Allaha u naxariistee isla goobtiiba ku nafwaayey.

Allaha u naxariistee Sheekh Maxamed Ceelbuur oo degaanka Ceelasha biyaha u tegay inuu booqdo qoyskiisa oo halkaasi degenaa, waxa uu markii la dilayay la joogay hooyadiis oo indho la’. Hadadba waxa ay Ehelada iyo Qoyska Sheekhu caddeeyeen in ay dilkiisa ka dambeeyeen kooxda Al-Shabaab , oo Maalmihii ugu danbeeyey kasoo yeerayeen Hanjabaado badan kadib markii ay ku guul dareysteen dagaallo adag oo ay la galeen Culamada (Ahlu Sunna Wal-jamaaca) , iyagoo markii ay ku guul dareysteen dagaalkii fool-ka foolka ahaa hadda u badalay in ay si gaadmo ah ku dilaan Culamada. Sheekha ayaa isla maanta lagu aasay magaalada Muqdisho iyadoo aaskiisa ay ka soo qeyb galeen Culamaa’udiin , Siyaasiyiin , Shaqsiyaad caan ah iyo Dadweyne fara badan.

Allaha u naxariistee Sheekh Maxamed Ceelbuur oo ka tirsanaa Culamada (Ahlu Sunna Wal-jamaaca) ayaa dilkiisa waxay astaan cad u tahay dagaalka kooxda Al-Shabaab ugu jirto inay dilal abaabulan ku fuliso Culamaa’udiinka Ahlu Sunna oo iyagu ah kuwo ku caan baxay fidinta diinta Islaamka, iyadoo shacabka Soomaaliyeed intooda badan ay ka soo aflaxeen Masaajidda iyo dugsiyada Qur’aanka ee ku yaala guud ahaan dalka oo dhan. Kooxda Al-shabaab waxey horay u dileen Horaantii Sanadkii tagay ee 2008 Sheekh Maxamed Kashka oo isagu ahaa Sheekh si weyn looga yaqiin Caana ka ahaa Magaalada Muqdisho kadib markii uu Sheekhu baadil ku tilmaamay dagaaladii ay jihaadka ku sheegeen ee ka socday dalka, waxaana sida dib laga xaqiijiyey dilkiisa ka dambeeyay kooxda Al-Shabaab.

dhinaca kale Afhayeenka Al-Shabaab Mukhtaar Roobow Abuu Mansuur ayaa horay u sheegay inaysan Al-shabaab la dagaashanayn Culamada (Ahlu Sunna Wal-jamaaca) , Xilli ay Dagaallo ba'an kula jireen Culamada (Ahlu Sunna Wal-jamaaca) ee Gobolka Galgaduud sida magaalooyinka Guriceel Dhuusamareeb iyo Galinsoor , oo ay Shabaabku kusoo qaadeen Weeraro , islamarkaana waxa ay faraha kula jireen burburinta Qabuurihii Mashaaikhdiii waaweynaa ee Ahlu Tasawufka (Ahlu Sunna Wal-jamaaca) ay soo qufayeen lafahooda banaanka usoo saareen , iyagoo kadibna ka iibsaday Gaalo Talyaani iyo Israaiil ah oo iyaga la socday kuwaas oo ka duubanayey Filimaan , waxaa kale oo hadalka Roobow beeninaya meeshana ka saaraya , hadalada Hanjabaadaha ah ee uu mudooyinkanba Qalabka Warbaahinta u marsiinayey Culamada , sida muuqatana ay hadda ficil ahaan u fuliyeen Kooxdiisa Al-shabaabka, balse la kari doonee meeshii ay Al-shabaab la gaarto haatan kadib kuna danbeyso xaaladoodu , mar hadii ay arintoodii fashilantay diikrana ka caadaatay isla markaana daboolkii saarnaa ka wareegay.

Waxaa kale oo dhamaan shacabka Reer Muqdisho ogyihiin ama ay la socdaan in dhamaan dilalkii qorsheysnaa ee horay loogu geystay Saraakiishii Dalka iyo Shaqsiyaadii caanka ahaa xilligii ay socdeen dagaaladii maxkamadaha iyo mudadii ka danbeysayba , in Cidda ka danbeysay ay ahayeen kooxda Al-shabaab , taas oo sida dad badani rumeysan yihiin ay cadeymaha loo hayaa aad u badan yihiin walina iskasoo daba dhacayaan iyagoo cadeymahaasina mar dhow soo bixi doona.

Sidaa daraadeed Ahlu sunna Wal-jamaaca uma dulqaadan doonto Ciyaalka afafka duuban ee ay soo adeegsanayaan Wahaabiyiinta Khawaarijta ah ee ku dhex dhuumanaya Shacabka dhexdiisa waxayna Ahlu sunna si dag dag ah uga qaadan doontaa Arrintan Tallaabooyin ku haboon oo munaasib ku ah iyagoo tala saaranaya Rabbi (S.W) isla markaana kaashanaya Shacabka iyo dhamaan Waxgarada soomaaliyeed, inshaa Allaahu tacalaa.